நல்லூரிலுள்ள தியாக தீபம் திலீபனின் நினைவுத் தூபி முன்பாக இன்று இடம்பெற்ற தியாக தீபத்தின் நினைவேந்தல் ஆரம்ப நாள் நிகழ்வில் தமிழ் தேசிய மக்கள் முன்னணியினருக்கும் ஏனைய தமிழ் கட்சிகளுக்குமிடையே முரண்பாடு ஏற்பட்டது.

நல்லூரில் உள்ள தியாக தீபம் திலீபனின் நினைவுத் தூபியில் அலங்காரத்தை மேற்கொண்ட முன்னணியினர் தமது கட்சியின் தலைவர், செயலாளர் உள்ளிட்டோர் சகிதம் நிகழ்வை நடாத்த முனைந்தனர்.

ஜனநாயகப் போராளிகள் கட்சியினர் கடந்த ஆண்டுகளைப் போல், இம்முறையும் நினைவேந்தலை நடத்த அழைப்புவிடுத்திருந்தனர். அந்தக் கட்சியினரும் நிகழ்வை நடத்த தயாராகினர். தமிழ் தேசியக் கூட்டமைப்புக உறுப்பினர்களும் கலந்துகொண்டிருந்தனர்.

இந்த நிலையில் நினைவேந்தல் நிகழ்வு நிறைவுற்றதாக அறிவித்த நிலையில் அங்கே பிரசன்னமாகியிருந்த வடக்கு மாகாண அவைத் தலைவர் சீ.வீ.கே.சிவஞானத்திடம் ஊடகவியலாளர்கள் கேள்வி கேட்க முற்பட்டனர்.

இதனை அவதானித்த தமிழ் தேசிய மக்கள் முன்னணியினர் வேண்டுமென்றே பாடலை அதிக சத்தத்துடன் ஒலிக்க விட்டனர். இதனையடுத்து தான் பேச விரும்பவில்லை என அவைத் தலைவர் பதிலளித்தார்.

இதனை அவதானித்த ஜனநாயகப் போராளிகள் அமைப்பைச் சேர்ந்தோர் பாடலின் ஒலியை குறைக்குமாறு கோரியதனால் மேலும் சத்தத்தினை அதிகரித்த நிலையில் “நிகழ்வு முடிந்தால் போகவேண்டியதுதானே பிறகு என்ன அரசியல்” என தமிழ் தேசிய மக்கள் முன்னணியினர் தர்க்கத்தில் ஈடுபட்டனர்.

அதன்போது ஜனநாயகப் போராளிகள் கட்சியினருடன் தர்க்கத்தில் ஈடுபட்ட முன்னணியின் மாநகர சபை உறுப்பினர், நானும் இயக்கம்தான் என கூறியவாறு தர்க்கத்தில் ஈடுபட்டார். அத்துடன், அவர் போராளிகள் கட்சியைச் சேர்ந்தவரை தாக்க முனைந்தமையால் பதற்றம் நிலவியது.

இருப்பினும் சிறிது நேரத்தில் அனைவரும் அங்கிருந்து கலைந்து சென்றனர்.